Sama

Zirsângkima, May 29, 2010 (5.10 – 10.25pm) Mím Kût thla laihàwl a ni a, ruah pawh a la súr duh buan buan viau mai a. A cháng chuan zíng lamah khua a thiang vuk a, chhùn lamah a sûr leh chiam thin a; a cháng leh zíng atangin a bei ngat ngat a, tlai lamah khua a rawn êng leh uar ang thin lawi a. Inchei sual awl hun lai ber a ni ngei ang. Vàngpui tlai khaw nêm duai hnuaiah Inrinni a ni a, ‘Ka chawlh ve ni alawm,’ tiin ka chhùn mut a. Ka mu tui ngang a niang, ka harha sana ka’n en chuan tlai dár li a lo pèl dêr tawh mai a. Khua chu a thiang vuk mai a. Kan pindan tukverh chu ka hawng a, favàng tlai khaw êng no mawi leh duhawm tak mai chuan min tiharh sawng sawng a, tlai ni ném duai maiin kan kawmthlanga khiang thing a chhun tlêt siaute chuan ka lung hi an ti-awi hliah hliah mai a ni. Kawmthlang tualzâwla naupangho infiam chu an ri chèl chûl mai a. Chutih lai chuan ka rilruah ka fapa a rawn lang zawk a. A piancham September 19 pawh kár leh a lo ni ta reng mai. Engtinnge kan lawmsak ang tihte ka ngaihtuah neuh neuh a. Chutih rual chuan kum ruk mi lekin zawhna chhàn harsa pui pui min zawh thinte chu ka rilruah an rawn lang zut zut bawk a; tin, ka chhàn thin dànte nen. Zawhna chhân har chu Dik tak chuan a zawhna thenkhatte hi chu pa tan pawha chhàn harsa tak takte an ni hlawm — “Pa, engatinge tawngtai kher ngai lo hian Pathian hian phone a neih ve mai loh?” tih te….. A nu nèn hian mahni mihringpuite leh nunna nei zawng zawngte hi Pathian siam vek an nih thu te, mi tinte hi midangte hmangaih tura siam kan nih thute hi kan hrilh dûn fo thin. Piangsual leh ramtui leilova awm te, mi rethei leh kutdawhte hmusit lova khawngaih zâwk tur kan nih thu te, mi’n kan huat zawng taka min tih cháng pawha dawhthei taka tuar hrâm hrâma ngaidam thin tur kan nihzia te, a hriatthiam àwm tâ wk lek lekin kan hrilh ve thin. Amahah pawh engemaw chen chu thusawi a nei ve nite’n kan hre thin. Chutia kan hrilh cháng chuan, “Pa, midangte kan hmangaih dawn chuan engtinnge kan tih ang?” te hi a ti thin a. A cháng leh a sikul rawn bángte hi inthlâk pawh a inthlâk hma hauh hian min rawn zawng kual ang a, “Pa, vawiinah kan Miss-in Rema a vua a, a hmangaih lo em ni? ‘Midang pawh in sual chuan ka vaw zêl ang che u,’ min ti a; min hmangaih lo em ni?” te hi a rawn ti haw var thin. Ka thiam ang tâwkin kan thatna tur a nih chuan hrem kan ngaih cháng a awm thute ka hrilh thin. Fa enkawl lam hi ka la experience ngai loh záwng tak thil a ni a, harsa tih em em chang ka nei ve thin. Mahse, ka fapa tluka min tihlimtu leh ka nun thlâk danglamtu thil dang engmah an awm lo tih erawh ka chiang a, ka tan a hlû a, a hlu zual zêl bawk ang. Bawihpuia thil sawi duhzawngte leh a thil min zawh thinte hi chîk taka ka ngaihtuah chang chuan midangte nunah hian hringnun mawi tak hi hmuh a duh nite’n ka hre thin. Hringnun hi a mawi mang e… tiraw? Ka inphih harh a, inchung zâwlah ka tei chho a, ni êng pawh a lo dul deuh ruih tawh a. Bawihpuia nu chuan pangpár leh thlai hnahte tui a lo pe mêk a. Bawihpuia nena April thlaa kan hmáwng phun pawh a lo duah tha ve viau tawh a, a hnah la no tak takte chu tlai thli vâwt rawn thaw heuh heuh chuan a chhém thle her her a, ni tla tur eng no nghulh mai chuan a chhun tle siau mai bawk a. Chulai hmuna awm, engkim maite chuan an mahnia ‘a mawi ber’ chu min lo hmuh ni ber hian ka hria. A nu chu tui ka khaipui a. A antam duah tha tak tak, thliin a rawn chhem ruala lo lám siau siaute chuan thu tam tak min hrilh ni hian ka hria. Ka phone-a kan hla chuam ka dah, Bob Dylan-a hla ‘You Belong to Me’ ngaithla pah chuan Bawihpuia piancham leh a tûka ka piancham lawm kan duhdànte kan sawi dun a. A cháng leh fiamthu kan thawh a, kan nui dùn leh bâwk bâwk thin. Ni tlâk dawn ruaiah pawh chuan Bawihpuia nu chuan a pangpár tui pêkna chu a la khai vá reng a, kan inen a, “Bawihpuia, Nang, Favàng tlai ni tla tur… hringnun hi a mawi mang e, tiraw?” ka ti a, kan innuih var var a. Ziak-reng-a chu! Bawihpuia hian a thian dangte aia danglam bîk riauna a neih chu thil ziah nuam a ti em em mai hi a ni. Pen leh lehkhapuan awm lo mah se, hmanrua engpawh, thil ziah nana hman theih àwm a hmuh tawh hi chuan khawiah pawh hian a rilru-a awm ang ang hi ziah a tum ringawt zêl thin. Kan In chhúng bang leh tukverh, a… dárthlalang zawng zawng hi a ráng rei ruai ringawt mai a ni. Tum khat pawh, choká-ah a nu puan thuina bulah a tâp a tâp a. Chhuata hriau lo tla chu a chhar a, a bul lawk fridge-a ‘My name is…’ tih a ziah lai tak chu ka va hmu fuh hlauh mai a. Pindanah ka ko a, kan inhau ta— “Hriau chu puanthuinaa hman tur, fridge banga thil ziahna tura siam a ni lo. Fridge bang chu rawng hnawih vek a ni a, hriaua kan thai chuan a ráng ang a, rawng thar lei a, hnawih that leh vek a ngai dawn a nia,” ka ti a. Ka thusawi lai chuan ngun takin min en kiau a. Hmanrua reng rengin hmanna tur bîk an neih theuh thute ka hrilh chiam a, chíng chhunzawm tawh lo turin ka vau bawk a. Chumi hnu chuan bang leh hmun danga a thil ziah hrât lutuk pawh chu a zia ve deuh niin ka hria. Motor neih thu Kum nga chuang bank-a pawisa ka lo khâwl tawh ka lâk chhuah ni chuan ka hlim ve hle mai. Bawihpuia piancham hma ni chiah a ni a, taxi-in Mahindra showroom ka pan a. Chhungkuaa hman atana ka lo hauh lâwk, Scorpio ka duh ang tak mai chu ka va la chhuak a nih kha. In lam pana motor thar ka khalh lai chuan tuma hriat loh hian ka lo nui leh ver ver thin. Tûnah chuan véng danga kan chhúngte pawh kan tlawh ve zung zung thei tawh ang a; Bawihpuia pi leh pute pawh kár tàwp chawlh hmanpui turin thingtláng lamah kan zin ve thei tawh dawn e… Bawihpuia pawh a unau dangte nen an inhmu tam thei deuh tawh ang a, unau pawh an inpawh theih phah dawn a ni, ka ti a, ka hlim hâw hle. Bawihpuia piancham chu Ngâkhlel em ema kan thlìr, September ni 19 chu a rawn inher chhuak ta nge nge a. Chumi tûk chuan duhawm fahran tak mai hian káwl chu a êng no nghelh a; nî rawn chhuak pawh chu tûk dang zawng aia thar bîk riau hian ka hria a. Bawihpuia zíng thawh hma chuan a nu’n min kai tho a. Nimin lama a cake lo va order chu a rawn chawi phei a, a khum bul dawhkànah chuan kan húng a. A piancham làwm tur hrim hrima rawn zin a pi leh pute pawh an rawn tho a, an present báwmte chu an rawn húng ve bawk a; tin, a ní te, a nute-i te chhungkuate paw’n. A zîng thawh hun àwm vêlah a khum chu kan hual laih a, ‘Happy Birthday’ hla sà-in kan kai tho a. A rawn harh chu a thophang ngang mai. Mak tih hmèl em em hian mi a en kual hé háw phawt a. Min rawn melh rual chuan a present dawnte leh a cake te chu ka va melh zawk a. A lâwm em em mai a, a rawn tho chhuak a, min rawn kuah chawn chawn a, kei chuan “Happy birthday son, I love you,” ka ti a. Engemaw hi sawi a tum ve a, a làwm vàng nge ni ka hre lo, engmah a sawi chhuak lo. A khum bul dawhkàna a thil dawn lam chu a pan thuai a. Chumi ni chuan motor thar leh Bawihpuia piancham làwmin picnic spot lamah kan chhuak dial a. Kan hlim tlang em em mai a, tlai dár thum pelh deuhah kan hâw a. Zanriah kîl hma-in motor chu ka va thlêk leh a. A zuartute’n engemaw chhiat palh thulha hmanraw hman mai tur min pêk telte chu motor-a dah fel pahin ka sil nghal a. Ka motor sil mêk lai chuan ka ha tiziau em emtu rî ka hria a. A tìr chuan engah teh vak ka ngai lêm lo; mahse, a ri chu a ring tial tial si a. Ka ding hlawl a, ri rawn chhuahna lam pan chuan ka vei thuak thuak a. Duat taka ka enkawl, ka motor thar front seat bang chu ka fapa chuan lung hriam hmangin a lo thai râng pek chu lo niin! Kum nga chuang pawisa pawh hmang tha phal lovin motor lei nan tiin kan lo inkhêk ve a ni a; a ràn hlau reng rengin uluk leh dimdawi theihtàwpin kan khalh chhuak ve a. Chutih laiin vawi tam tak ka lo hrilh tawh leh chíng tawh lo tura vau pawh ka lo vau hial tawh ka fapa-in a thil lo tihsual tawh thin ang chiaha ka motor thar a’n tihmélhem ta mai chu ka ngaithiam thei ta lo. Ka sa hat a, ka thinin a tuar ta lo— Motor chu ka hawng sawk sawk a, ka hmanraw hmuh remchàn hmasa ber chuan ka vaw ta a ni. A vuak pawh ka vaw na hle tih pawh ka hria. Mahse, ka fapa chu a tap tlat lo. A nu ka va ko va; ani’n a fapa duat lai na tuar hmêl, tap thei bawk si lo chu a hmu ngam lova, Bawihpuia pû chu a va ko a. Kan buai ta luai luai mai a. Ka duh loh ber kan thleng dawn ni hian ka hre tlat lehnghal a. Ka motor thar, Bawipuia’n a bang a thai ràn zawh chiah chu a la tlàn tha thei khawp mai a, Damdawi In thleng zo tur na nâ na chuan… Ka fapa vuak nan chuan wrench ka lo hmang a lo ni. A kut ruhte leh a hnungzáng ruhte chu ka lo vaw tliak nasa hle a lo nih chu! Chumi zàn chuan Bawihpuia chu ka ko zankhua thak a; vawi khatmah min chhàng lo. A thil tihsual chánga ka hnêna a tih ziah thin angin tûn tum chu a hnènah ngaihdam ka díl ve ta thung! Ani kha chu ka ngaidam ziah thin kha a nia; min dìl hma hauh atang tawhin ka ngaidam sâ diam tawh thin. Mahse, ka hnêna ngaihdam min dìl tawh zât aia tam fé ka dìl hnu paw’n ani chu a la ngawi tlat mai si… Kár hmasa mai pawh khan a nu nèn amah vànga khawvêl nuam kan tihzia te, hringnun mawi kan tihziate kha hahípin kan sawi dùn a nih kha! Tûkin mai pawh khan, Bawihpuia kha a hlim em em mai a, vawiin chhùna tuichèn zirtír tùra min ngen nasat ziatea kha… Ka mitthláah engkim mai chu an la lang chiang em em mai si! Kha naupang fel, nunmawi leh zaidam em em mai kha, amah Siamtu khan a nunna atan boruak a thâwk luh kha tâwk a ti thin; mahse, tûnah chuan khâwl hmangin a thaw ta! Zíng káwl a rawn êng tan dék dék a; chumi ni lo thleng tur chu ka piancham a ni. Káwl chu rawn êng lo se ka va’n ti tak êm! A chhan chu ka fapa hian min kalsan mêk a ni. Chumi tûk dár 5.30 vêl chuan Bawihpuia marphu, nimin mai pawha tha taka kal kha an chàwl rual ta thuap mai a nih chu! Chu mi ni chu ka birthday … maw?! “Pa…” Motor-in ka tlân hâw a; tah pawh hi ka tap thei lo. Ruah chu a sur buan buan a. Ka motor khalh lai chu ka haw em em ringawt mai a ni. Ka fapa aia ka lo hmangaih hman chu hrehawm ka ti a, ka thiltihah ka inchhîr em em mai a, ka inten a, ka zak ngawih ngawih a ni. Kan In kawt ka thlen chuan nimin tlaia ka motor hùnnaah chiah ka húng leh a. Motor hmaah chuan ka thingthi a, ruah paw’n min nan huh zawr vek dawn tihah chuan Pathian hnênah ngaihdam ka díl mawlh mawlh a ni. Bawihpuia’n ka motor thai ràn nana a hman lung hriam pawh chu ka kiangah chuan a lo la awm reng a. A thil ziah rànna lam chu ka va pan a. Chirhin a lo hliah vek a; a thil thai ràn chu engmah a hmuh theih loh. Ka kut chuan ka’n chúl thuak thuak a, chutah “Pa…” tih lo inziak chu ka fapa sùlhnu ngei a ni tih ka hai lo. Ka chúl fai phei zêl a, a birthday tûkah khan lawmthu min hrilh a tum ve ngei a; mahse, engmah a sawi ve thiam lo a nih kha. Bawihpuia chuan ka hnênah a thiam ang bera lâwmthu min hrilh a lo tum ve chu lo niin! A thil thai ràn chu ka chhiar nawn leh thin — “Pa, thank you, I love you so much!” Nunna nei chu hmangaih tur… Ka bengah chuan ring em em mai hian Bawihpuia zilh nana ka thu hman fo thin chu a rawn thleng ta— “Mahni mihringpuite leh nunna nei tawh phawt chu hmangaih tura siam an ni…. Hmanrua chuan hmanna tur bik an nei theuh. Hriau chu puanthuinaa hman tur, fridge banga thil ziahna tura siam a ni lo. Fridge bang chu rawng hnawih vek a ni a, hriaua kan thai chuan a ráng ang a, rawng thar lei a, hnawih that leh vek a ngai dawn a nia…” Chutah, ka fapa âw ka hre zui zat a, “Pa, rawng chu engzât man nge?” I chhiar tâk hi thawnthu mai a ni. A ziaktu hian dárkar riat chhúng ‘pa’ dinhmun alo luah ve zawk tawh a ni. Kan fapa hmasa ber ni turin Pathianin Lalrinhluzuala chu ka piancham hma ni chiah September 19 khan min pe ve a; mahse, ani pawh ka pianchamah chiah Lalpa’n min lâksak leh ta. Ka fapa chuan, “Pa…” ti paw’n min au hman lo a, a nu hnutê pawh a hne hman hek lo. Thil zirtir theih a ni lova, hringnun mawizia leh lunglènthlâkzia pawh hrilh rual a la ni lo. Mahse, amah zâwk chuan thil tam tak min zirtir thung. Mi fa piang tìr an tah noh noh laia tap ve thei loa nun a sual laite khan thil tam tak min zirtir a…a awm tawh loh hnu, a piancham kum khat a thlen dawn thlenga zirlai min zirtir tam tawhzia hi… Kawng dik lo ka zawh leh dawn cháng te leh ho taka khawsak leh dawn chángte hian, Bawihpuia’n “Pa…” tia mi ko rî ka hre thin a; vawi tam tak ka kawng zawh tum ka kîrsan fo thin. Rawng man chu ka hria. Fridge chu a bang mai ni lo a thar hlawk paw’n thlâk dawn ila, pawisa engzâtnge sèn ngai dawn tih ka hria e. Mahse, ka fapa, thlàna mu tawh kaitho leh tur hian sum engzâtnge ngai dawn tih erawh ka hre lo!