Sama

Hmasawn November 18th, 2010 12:00 pm by aduhi Kan inluah piah lawk a veng pakhat hi marble leh granite vel an zawrhna hmunpui hi a ni a, state dangah te pawh an thawnchhuah ve nasat avang in zanlaiah hian truck an ding khup thin a. Nizan chu dawr pakhat kawtah hian truck driver ni ngei tur mi pahnih hi an lo thu a, meizial an lo zu a, an titi tui hmel khawp mai a. Eng buaina te nge an neih a, enge an duhthusam te chu va hriatpui lo mah ila an hna ah khan an lungawi tawk hmel khawp mai. Truck driver ho leh veivak remchang te tan thingpui zuar a lo awm bawk a, a chhak lawkah meizial zuar a lo awm bawk a, dawrtu pawh an nei ngah phian. A vawh deuh vang emawni ice cream zuar erawh kha chu tuman an lo dawr lem lo. Anmahni hna theuh ah khan an lungawi hmel hlawm khawp mai. Mihring kan nih chhung chuan hlimna leh lungawina hi kan zawng lo thei lo a, hlim tumin thil tam tak te kan ti chhin thin. Mahse ka rilru a rawn lang leh thin chu “chantawk a lungawi” hian kan lo hlim ber mai tih hi. Truck driver ka hmuh te khan damchhunga driver nih a, inchhung lum ah pawh awm hman lo a zinkual reng mai kha an duh bik kher lo ang. Sawrkar hna tha tak thawh te pawh an chak ve ang, daktawr nih te pawh an chak ve ang. Mahse chhan dang tam tak vangin driver hna chu an thawh a lo ngai a, an hna kha lawm takin an thawk a, an hlim a ni mai. Chantawk a lungawi hi a tha hle, mahse mihring hmasawnna a dal ve thei tlat. Tuna ka dinhmun ah hian lawm tawk em em ila, hei ai hian hma ka sawn thei tih pawh hre reng ila, mahse ka lawm tawk miau avang khan hmasawn tumna rilru kha ka pu lo thei tlat a ni. Mihring te chu hmasawn tura siam kan ni si a. Kan hnathawhnaah kan kaisang pur pur kher lo a nih pawh in hmasawn dan dang chu a awm zel tho. Hna awlsam deuha thawh dan te, midang lo tih thin dan ang lo deuh hlek mahse tihdan tha deuh te pawh kan hmuchhuak thei, hmasawnna vek a ni. Kan class ah pakhatna ka han ni thut kher lo maithei, mahse ka zirlai te hi thiam lehzual tumin tan ka la sauh sauh thei. Mahse hmasawn tur han tih hian tuna kan dinhmun hi hrehawm tih tlawk tlawk kher tur a ni lo a, mi te umphak emaw lehpelh duh vang hrim hrim a diklo taka chet vel tur pawh a ni chuang hek lo. Pathianin kan chungah ro a rel a, a duhna ah tak min dah a, lawm takin pawm ila, mahse Pathian hian a tha lam zawng a thang tur hian min duh reng a ni tih hi i hre reng ang u. “Eng pawh ni sela, kan thlen chin atang khan hma i sawn zel ang u” (Phil 3:16)