Sama

Mahni tuina lam leh luhchilh lam a nih em em vang pawh ni hran lovin tangkaipuitu kan lo awm palh tak leh hriatzau nan hrim hrim atan tun tum chu Kawng na chungchang hi tlemin i han ziak teh ang.

A hmasa berah chuan mihring hnungzang hi ransa dang ang thova ke pali ringa bawkvak a kal tura siamtu lo duan a ngaih a ni thin. Ransa dang ang lo taka ke pahnih chauh rinchhana kan taksa rihna kan phurh takah chuan kum a lo upat zelin hnungzang ruh leh tihrawl te hi, an chakna leh rit lak theihna a lo tlem tial tial a mathei lovin kawng leh hnungzang na hi a awm ngei ngei a ni.

Mi tam zawk te hian kan hun lo tawn tawhah kawng na emaw, kham emaw chu kan lo nei deuh vek tawh ngei ang le. Chumi chungchangah chuan hengte hi hriat a inzawh fo a tha hle mai.

A lo lanchhuah/in tan dan: Zawimuanga intan a a thla tel a a nat dan zual hret hret te a ni thei. Chuti ni lovin thawk leh khata rawn na thut pawh a ni thei bawk. Ngaihbel theih tura a lo intan chhan hriat theih mai te chu; rit chawi, tluksual  leh insawh palh vang  a ni tlangpui.  A intan dan a zirin a chhan tur chu a rin theih mai thin. Chhan awm lem lo pawhin a na ve thei tho a ni tih chu  thuhmahruaiah  khian a rawn sawi tawh khi.

A behbawm: Kawngna behbawmah hian khawsik, taksa bung/ruh chuktuah na dang te, taksa rihna tlahniam, chaw ei tui lo, zawi ngawih ngawih leh, hrisel lohna riau neia inhriatna te a awm thei. Chutiang chuan i awm em le? Kawngna satliah mai nei lova heng a behbawm te hi nei tel i nih chuan ngaihthah mail ova bawhzui vat a tha a ni. Ruh  TB  leh Cancer vanga kawng na nei te i lo ni palh hlauh dah ange.

A natphung: Hunbi nei a na leh han chawlhhahdama reh hlauh a nih chuan ngaihthat lohna em em tur a awm lo. Chuti ni lova, na reng mai, awm mai mai pawh a na, nachhawkna damdawi pawhin a a chhawk that mang loh leh muthilh pawh harsatpui khawpa na a nih chuan buaipuitham a ni tih hai suh ang che.

Na nen a inkungkaih: Khuh emaw hahchhiau emaw a na a zual sauh te leh kawng mai ni lova, malpui hnung, malte leh ke thlenga na tel a nih chuan Sciatica (SAITIKA) ang chi na nei te i ni thei a ni. Ke zawi leh mu chuah chuah te leh nak nem na te a awm thei bawk. Hmeichhe tan kawngna chu thineih lai chauh in a awm thei a, a zual thei bawk a ni.

Kawng nat chhan tlangpui.

Intih palh/inhliam: Chetsual palha insawh nat palh vangin kawng a na in a kham thei. Hetiang na tamzawk hi chu inherh kan tih ang hi a ni. Malis, tuilum a deh  leh bawlhlo eng eng emaw hnawih hi a thatlohna a tam a, chin loh a tha. Nachhawkna thatak ei a hahdam tak a rit la lo a awm hi a tawk viau a ni. Ruhtliak a awm tel erawh chuan mahni a inenkawl ngawt chi a ni lo.

Kum upat vang: Kum upat vanga ruh leh ruh inchuktuah danglam zel vang leh ruhmawih/ruhmuat (osteoporosis) vangin kawngna benvawn tak a awm thei. Damdawia uluk leh kumhlun a enkawl a ngai tawh thin. Mawhphurhna neia inhria chuan chhungte tan hmalak vat chi a ni.

Cancer: Ruh cancer avangin na na tak, a chhun a zana na a awm thei. A tir lama a  natphung kan sawi tak ang a nih chuan inenkawl vat a tul thin. Cancer vang a nih chuan kawngna mai bakah hian hnungzang ruh tliak in mi a tlakbuak thei, khumbeta awngrawp reng theihna a ni. Urgent a ni ringawt mai.

Infection: natna hrik hrang hrang ten hnai la in awmhmun an khuar thei. Khawsik in a bawm tel tlangpui. Taksa nawmsam lohna dang ten a tlakbuak tel bawk. TB hi kan ramah (India) a hluar hle, enkawl hma loh chuan damlo zeng (paralysed) in a siamthei. Hriat a hmalak hma a tha hle. HIV era ah phei hi chuan infection vang hrim hrim a kawng na hi a pung chho mek a ni.

Thildang: disc prolapsed kan tih te, kawchhung taksa peng dang hrisel loh vang te leh hmeichhe chikawng leh thineih felhlel  avang ten kawngna benvawn tak a awm thei. Hna in a zir loh vang leh thutna (chair) that loh vang te pawhin nileng a officea thu a hanthawk te zingah kawngna nei an tam hle bawk. Sikul naupang bag rit tak tak ak thin te pawh chuti tho. Pianphunga ria leh sang, zangkul du a thu thin te tan pawh harsatna liantham tak a ni.

Kawngna nei a i kawngna in a tihbuai fo che chuan i natdan kha nangmah lo inzawtchiang rawh. A chhan i hmuhchhuaha i umbo theih chuan a tha. A tul a nih chuan damdawi thiamna lam rawn la, a hma lamin in enkawl ngei ang che. Chutichuan hun rei tak insawiselna nei lovin zan rei tak tak thleng kawngna sawi tur awm hauh lovin misual.comah i comment zuah zuah thei mai dawn a ni.

(Misual.com)