Sama

I Nupui chu– I thinlung chhungril ber neitu leh mihringin hmangaihna a neih sang ber i hlan a ni a. Atan i rinawm a, atan engkim i huam a. A tel lo chuan zan khat pawh i tlei thei lo a, a hmel hmu lo chuan ni khat pawh i awm thei lo a. Rualawta a awm loh nan thahnemngai takin hna i thawk a, a duh leh ìt zawng apiang lei nan sum duh tawk i pai a. Chutia’ng khawpa i hmangaih chu– Nun khawhar takin a lo awm reng thei a sin!

Pathian hmangaihna tluk zeta nasain hmangaih mah la, a mamawh tinreng (nia i hriat) te pein, tlachham loin siam mah la, thuam tha ber ber leh rangkachak man to ber te nen chei mah la, chutia’ng khawpa i hmangaih chu– Nun khawhar takin a lo awm reng thei a sin!

Zingah i tho a, chaw i ei a, hnaah i kal a, tlaiah i haw a, i inbual a, zan a lo ni a. Inkhawm, Committee, khawhar In len i ti a. I chhuah loh zanah TV, Computar hmaaah i thu ‘pa’ ringawt a, tawkfangah lehkhabu i chhiar san leh a. Chutia’ng chu i nitin hun hman dan a ni a. Leng dang chhai lo leh luangno tlan loin atan rinawm tlut mah la, chutia’ng khawpa i hmangaih chu– Nun khawhar takin a lo awm reng thei a sin!

Hmeichhia chu hmeichhia an ni miau a, an rilru a nêmin suangtuahna leh zeldin thu an kawm nasa a, pangchan te hi nuam an ti em em a ni. Khawvel thila an mamawh engkim pein, hmangaih rumrut mah ila, ngaihsak hlawh loa inhriatna leh, an mahni aia pawimawh nupa kara tlazep awm nia an hriat tlat chuan, an rilru a nâ mai thin. Chu chua’n nun khawharnaah a hruai lut a.

I nupui kha a nun khua a lo har ve dah ang e– Ngaihsak fo rawh. Ngawi renga hmangaiha intirinawm tlut lo khan, i hmangaiha i thlahlel takzet a ni tih hunawl i neih apiangin, a tam thei ang ber lanchhuah tir thin ang che. Hna/ Sum & Pai/ thil dang zawngte aia pawimawh ber leh, i thinlunga hmun chang thuk ber a nihna te kha ren lek loin fah mawlh mawlh thin rawh. Hnampui ho hi kan tluk lo fo… Kan hre lo nge, kan intih pa vang nge, kan tum lo hrim hrim aw…? Han bawl a, han chhaih/ fiam vel te hi nuam an tiin, an hlimpui em em a ni. Nun khawhara a awm loh nan– I Nupui Bâwl rawh!

(Misual.com.)